ما كان لله ينمو وطول عمره محمد علي أعماله لله
محمد علي ناصر فران، والله يا قائد ما بيعرف حاله الواحد من وين بدو يبلش حكي..صدقا أنا محتار! مش صف كلام بس والله عقد ما يحكي الواحد مش رح يحيط بكل جوانبك و على قولة أهل الثقافة اللي انت استاذن ..انت "بحر متلاطم أمواجه". ولأن واجب علينا نعرّف الناس عليك رح حاول قدر المستطاع والمعرفة احكي عن خلية النحل اللي اسمها محمد علي فران.
ما في عبارة رح تمرق بهالنص فيها مبالغة بل قصور وتقصير فقط، خلية نحل لأن يا أخي وين ما تحطه لهالمخلوق بتلاقيه مليان حركة وجد ونشاط وفيقة من قبل الفجر. اذا كان شغله بالجنوب بتلاقيه مأسس شي ٣ منتديات ثقافية بتجمع عُمر الشباب والناشئة، بياخد على عاتقه التنظيم والتواصل مع الشخصية المُحاضرة، وبتلاقيه مأسس مجموعة تلغرام تُعنى بدروس صباحية برعاية الشيخ محمد سبيتي وليس انتهاءً بضيف مثل الأسير الفلسطيني الشيخ الشهيد خضر عدنان.. مئات الأيام وهالمجموعة عم تكبر، بلشت ب٥ أشخاص وصارت فوق ال ٧آلاف من مختلف الدول العربية وما كان لله ينمو وطول عمره محمد علي أعماله لله.
منجي عالكشاف وتربية العناصر بكل أبعادها، النفسية التربوية الثقافية والرياضية، حتى قرآنيا كان يحثّ ويتابع..ما بيتعب ما بيعرف الراحة.
مخلوق ضهر من منطقة الراحة تبعته من أول طلعته، كيف لا وهو ابن المربي الخلوق الصابر اللي بينحلف بإسمه الحاج ناصر فران.
مؤسس مجموعة تعنى بنقاش شهري للكتب، من فكر الإمام الخامنئي لفلسطين للأدب الشرقي للأسرة.
تخايل إنه كان يبادر إنه يعمل مسابقة للجامعيين ويعنى بكل تفاصيلها من المراقبة للجوائز للمتابعة للأسئلة لللل..
مشارك ضمن فريق عمل مراسل ٦١ للهجرة المعني بنقل أخبار عن رحلة الإمام الحسين من المدينة إلى المدينة.
بتلاقيه ماخد مبادرة ينظّم صفوف جمعية الخرجين بمدرسة المصطفى النبطية وبكل نشاط بتابع وبقدم مقترحات وبيعمل نشاطات ورحلات وبنظّم افطارات، وبجيب شخصيات، بيجمع الخريجين ع مباراة فوتبول كل اسبوع، ببادر لينظم حفل ارشاد طلاب الثانويات على اختصاصاتهم، كل شي نذكر مجرد مبادرات يعني لوجه الله.
يمكن يتساءل حدا عادي متلي ويقول : ليش خيي؟ شو صاير عليك؟ ليش حامل هالهمّ على كتافك!
مؤسس بنادي اقرأ بالجنوب، ومشارك بمبادرة فسيلة، مؤسس للسهرات الشبابية الاسبوعية حضوريا الي كانت تقام برعاية الشيخ محمد سبيتي، ولمّا صار في كورونا، ما يئس، تابع الجلسات الثقافية أونلاين. بيدوِخ والله بيدوِخ، وين ما فيه لقاء ثقافي تربوي بتلاقيه اذا مش ضمن الحضور، ضمن المنظمين. منجي عالشق التربوي، بين ثانويات المصطفى ص والصبّاح بالنبطية، أعطى محمد عصارة ثقافته وحياته بطلابه، مربّي حرفيا مش مجرد لقب يعني، بتضهر من حصته متعلّم علومك الاكاديمية ولاقط شي حديث أو حديثين من كلام أهل البيت عليهم السلام.
الاستاذ محمد مجاز بالفيزياء وماجستير باللغة العربية، ولعله محصّل شهادات غابت عن بالي.
من فترة قصيرة نقل شغله الثاني على مكان غير الجنوب، ما في كم يوم وبتلاقيه عم يدعي للقاء ثقافي بالمنطقة اللي نقل شغله عليها ! قديه بدك تكون مفعم بالطاقة وديناميكي لتروح تتعرف على مكان وتجمع ناس من غير منطقتك وتأمن شخصية مرموقة تحاضر فيهن!
شاب من شدّة حبه وبرّه بوالده متّخذ اسمه الاسم العسكري..ناصر.
مثقّف؟ كتير. مشتبك؟ عأكتر.
حسيني التربية، محمّدي الأخلاق، علويّ الإيمان. نموذج سليم لكل شاب صاعد للإقتداء فيه.
جمع العلم والعمل والتقوى..
هنيئا لك يا (مدير) متلما كنا ننادي بعض.
أفضل خاتمة لمستحقّها والطامح إليها.. ومش عن عبث إنه من كرم الله تكون ليلتك الأولى من عالم البرزخ هي ليلة جمعة.
وشو أعظم من إنه عدوّك ببيان الناطق بإسم جيشه ب ٢٣-٥-٢٠٢٤ يحكي عنك هيك يا محمد علي (هاجمت طائرة لجيش الدفاع في وقت سابق من اليوم وقضت على المخرب المدعو محمد علي ناصر فران، الذي كان مسؤولاً عن .. في جنوب لبنان.)
اللي انكتب جزء من أجزاء شخصية الشهي د محمد علي ناصر فران..وما خفي منها أجمل وأعظم.
هنيئا يا غالي هنيئا يا قائد
* أحمد سلوم
